Le Ray l’a dit, dins les guerr’s de la France,

Quand l’ caporal s’apprèteot à buquer,

S’ ertournant su s’ n’officier d’ordonnace:

“Dis deonc, l’ami, c’qu’on peut bèteot qu’ mincher ?

“No n’aid’-de-camp s’ertourneot tout d’ein‘ traque,

R’weitieot au leong et puis diseot comm‘ cha:

“Sa Majesté, on peut donner l’attaque,

On peut qu’ mincher, les Tournaisiens seont là !” 

 II

D’ aussi longtemps que l’mémoire l’permetta,

Cha‘ té comm‘ cha, dins la guerr‘, dins la paix:

D’ Jérusalem, t’iest-c‘ qui feonc‘ les ferniètes ?

Tous les premiers, ch’est deux infants d’Tournai.

Et Godefroid, tout in suivant leu trache,

D’ein‘ veox d’taureau, crieot à ses soldats:

“On peut passer, pour tertous i’ a de l’plache,

On peut rintrer, les Tournaisiens sont là !” 

 III

Ein peu pus tard, quand les trois heomm’s de tiètes,

F’ seot‘ nt’e tuer pèr’s pour des brins d’thiens, Etant su l’point d’attraper ein‘ doguette,

L’ v’neot’nt’e querr‘ l’appui des Tournaisiens.

Le Roi Louis connisseot bin cell‘ sorte,

Car i’ diseot, in s’mettant su s’ mat’las :

“Je r’pose en paix, ne fermez pas la porte,

J’peux m’endormir, les Tournaisiens sont là !” 

IV

Dix-huit chint trinte éclate, et la Belgique

Tour d’ein‘ seul beond à Bruxell’s a volé, A pied, à qu’veau, heomm’s posés et pratiques,

Autour du Parc, nos gins veont s’imbusquer.

Les Brabancheons in erweitiant leux faches,

Ont demandé: “Quoiqu’ch’est qu’ces gaillards-là ? ”

Quant i’eont su d’quoi, i’eont dit:

“Nous seomm’s à plache“

 Nous seomm’s sauvés, les Tournaisiens sont là !” 

V

 Nos combattants, ch’éteot de l’beonn‘ seminche,

Et d’pu c’temps-là on les a vus pousser, Dins les bieaux-arts, dins l’armée, les scienches,

T’iest-c’qui a l’pompeon ? ch’est nous eaut’s sins s’vanter !

Et quand l’ z’inglés i eont fet aller leu blaque

Su nos soldats, t’iest-c’qui les rimbarra ?

Ch’éteot Renard qui leu livreot l’toubaque,

I-eont dit: “Motus ! les Tournaisiens sont là ! 

VI  

Et si pus tard i’ faudra qu’on r’quéminche,

Aux greos, aux p’tits, ein Belg, sareot prouver Qu’i n’suffit pos de dir: “Tés-ta, j’te minche !

“Neon i avant cha, i faudreot du touilliage,

Dira: “M’z’infants, l’ennemi est là-bas !

“Nous s’écri’reons: ” Anous, Tournai, courage !

“On sintira qu’les Tournaisiens sont là !
Adolphe  DELMEE ( 1820 – 1891 )Texte intégral et orthographe d’une édition de 1882

J’avoue ne pas comprendre le rapport avec l’acte de décrocher des charcuteries pendues au plafond.

Si quelqu’un a la réponse cela m’intéresse.